Яңа чыкты (Тукай)

Викикитап, ачык эчтәлекле китаплар җыентыгыннан
Яңа чыкты
АВТОР Габдулла Тукай

Яңа чыкты


Укымаган мәдхүмнәрне мулла кую яңа чыкты, —
Мәскәү малын ябып калу яңа чыкты.

Әүвәлдәге хаҗилар суфи иде, —
Хаҗи булып кеше алдалау яңа чыкты.

Әүвәлдәге ишаннар да тәкъва иде, —
Ишан булып акча җыю яңа чыкты.

Мөселманнар бер-берсенә кардәш иде, —
Хулиганлык, шпионлык яңа чыкты.


?