Туңдырма (Ринат Нуруллин)

Ринат Нуруллин

ТУҢДЫРМА

(Шигъри башваткыч)

Бик тәмле булса да катык,

Яратам туңдырманы.

Булсын гына - йөздән артык

Ашый алам мин аны.

Әбием пошаманлана:

- Салкын тияр, улым, - ди.

- Кызу-кызу ашаганда

Салкын тими ул, әби!

...Туңдырманы бер-бер артлы

Кабып йоту килешми -

Берсе беткәч, иң кимендә

Өч минут ял тиешле.

Туңдырмам эри башлады,

Әйтеп бир әле тизрәк:

Йөз эскимо ашаганда

Ничә минут ял кирәк?

Кулланылган әдәбият

1.Нуруллин Р.Г. Альпинист үрмәкүчләр: шигъри башваткычлар / Ринат Нуруллин. — Казан: Татар. кит. нәшр., 2008. — 88 б. – 5000 д. – ISBN 978-5-298-01656-8.