Татар мөхәрриренә (Тукай)

Викикитап, ачык эчтәлекле китаплар җыентыгыннан
Татар мөхәрриренә
АВТОР Габдулла Тукай

Татар мөхәрриренә


Яз, ни язсаң да, синең бар — язганыңның нашире;
Ашлыгың үстисә — бир, тайярдыр аның гашире.

Тик онытма: бер заман гүргә керер ялгыз башың;
Һичберәү булмас яныңда: иптәшең һәм кардәшең.

Барча әгъзаң чиркәнеч һәм куркыныч хәлгә керер;
Уйлаган башың, каләм тоткан кулың бергә черер.

Дөньяда булган кеби язганнарынның нашире,
Монда да кортлар — синең үлгән тәнеңнең «нашир»е.


?