Күгәрчен (Тукай)

Викикитап, ачык эчтәлекле китаплар җыентыгыннан
Күгәрчен
АВТОР Габдулла Тукай

Күгәрчен


(Русчадан)

Бер урманда агач астында, яшьрен,
Качып утыра иде мискин Күгәрчен.

Якыннан шул вакытта узды Лачын,
Җәеп, селкеп канат атлы колачын.

Эченнән сөйләде шунда Күгәрчен:
«Бу Лачын нинди көчле кош, күрәмсең?

Көче күп, тырнагы үткен, явыз ул,
Зәгыйфьләрне ашар, канлы авыз ул.

Вәләкин мин ризамын язмышымнан,
Ходай кыйлган мине көчсез кошыннан:

Зәгыйфь, корбан булу артык, ходаем,
Булудан андый көчле һәм дә залим!»


?