Имән бармак бармак саный (Ринат Нуруллин)

Викикитап, ачык эчтәлекле китаплар җыентыгыннан
Навигациягә күчү Эзләүгә күчү

Ринат Нуруллин

ИМӘН БАРМАК БАРМАК САНЫЙ[үзгәртү]

(Шигъри башваткыч)


Чәнти бармак чәчү чәчә,
Атсызы иген игә.
Урта бармак чигү чигә,
Баш бармак бишмәт тегә.

Имән бармакны син нигә
Искә алмадың? - димә.
Аны күрдем кичә генә,
Трамвайда кайттык бергә.

Килеп чыккан иде Имән
Бияләй тишегеннән.
Аның ихлас сәламенә
Мин дә кайтардым сәлам.

Хәл-әхвәлләрне сорашып,
Корып бардык әңгәмә.
Алдык хәттә бәхәсләшеп
Бер кыен мәсьәләдә.

- Беләсеңме, - диде, - нигә
Без саныйбыз унарлап?
Чөнки бөтен кешенең бар
Ике кулда ун бармак.

Ә хәзер мондый сорауга
Тәфсилләп бир син җавап:
Аяк-тоякларда түгел,
Ун кулда ничә бармак?

- Унны унга тапкырласаң,
Йөз бармак була, - дидем.
Килешмәде Имән бармак:
- Бармаклар саны илле!

Бәхәстә мин бик түземле -
Бирәммени сүземне!
Юлдашым да катгый торды
Карашында үзенең.

...Күпне күрә, күпне белә
Карап торучы читтән.
Әйтеп бирмәссеңме безгә,
Кайсыбыз хаклы икән?!


0416071543.jpg

Кулланылган әдәбият[үзгәртү]

1.Нуруллин Ринат. Өч бүре һәм өч сарык: Шигъри башваткычлар. — Казан: Татар. кит. нәшр., 2004. — 79 б. – 5000 д. – ISBN 5-298-01326-0.