Балкан көйләре

Габдулла Тукай
Тулы исеме	Габдулла Мөхәммәтгариф улы Тукаев
Һөнәре	шагыйрь, тәнкыйтьче, публицист
Сайт	Тукай сайты

I

Төркия бетә

Дип һәркем көтә, —

Балканнар эше

Гел алга китә.

Тик шул Әдернә

Алынмый менә.

Яния, Шкудра

Тиде теңкәмә.

Чыталҗа яман,

Аузы тулган кан,

Туплар дисеңме,

Зурлар дөньядан.

Ай-һай, Чыталҗа,

Син майлы калҗа;

Сине йотмыйча,

Истанбул кайда?

II

Сүзләр куештык,

Дүртәү сугыштык;

Зур кошлар төсле,

Лондонга очтык.

Монда төрекләр —

Ямьсез терекләр —

Авызларыннан

Чәчәләр утлар!

«Сез кемсез, диләр,

Без төркез», — диләр;

Җиңелдек дип һич

Өмет өзмиләр;

Диләр: «Госманлы

Өч истихкямны

Кулда тотканда,

Туктатмас канны.

Артык шаулыйсыз,

Бик күп даулыйсыз.

Нигә тарихтан

Гыйбрәт алмыйсыз?

Руслар да җиңде,

Якынгук килде;

Аңар нәмсәләр

Күпме җир бирде?

Курыкма, нәмсәләр —

Безнең кемсәләр,

Вильһелем лаек,

Калиф дисәләр.

Безгә бар да бер,

Итсәгез сабыр,

Чыталҗада да

Сезгә бар кабер!»

Аңлатмалар

Истихкям — ныгытма.