Ай һәм кояш

Викикитап, ачык эчтәлекле китаплар җыентыгыннан
Моңа күчү: навигация, эзләү
Габдулла Тукай

Тулы исеме Габдулла Мөхәммәтгариф улы Тукаев
Һөнәре шагыйрь, тәнкыйтьче, публицист
Сайт Тукай сайты


Һималая тау өстендә алтын бишек,

Кояш йоклый һәр кич саен шунда тешен;

Җил төн буе йоклаганын саклап тора,

Тирбәтә һәм өстен-башын каплап тора.


Йокысыннан Кояш ничек уяндисә,

Җил шул вакыт җилбер-җилбер итеп исә;

Исә-исә бөтен дөнья буе китә:

Торыгыз! — ди,— уянырга вакыт җитә!


Торып чыккач шул бишектән Кояш агай,

Анда кереп йоклый инде энесе Ай:

Йоклый шунда йолдызлар да өелешеп,

Оядагы йоклап яткан кошчыклардай.


Каты йоклап Ай бишектә мәгърибкәчә,

Торып чыга, көлеп җиргә нурын чәчә;

Кояш һәм Ай — ике туган агай-эне —

Менә шулай дустлык берлән нәүбәтләшә.

Аерым сүзләргә аңлатмалар[үзгәртү]

Уяндисә — уянды исә.

Мәгърибкәчә — кояш баткангача.

Чыганак[үзгәртү]