Сүз боткасы (Ринат Нуруллин)

Ринат Нуруллин

СҮЗ БОТКАСЫ

(Шигъри табышмак)

Озын сүзнең кыскасы -

Авыз ит сүз боткасын.

Ботканың тәмле сүзе

Дүрт сүздән тора үзе.

Беренче сүз сыртына

Су сибә хортумыннан,

Ә икенчесе җиргә

Дагасы белән тибә.

Өченче сүз ишелгән

Өч йөз алтмыш биш көннән.

Дүртенче сүзме?.. Ансы

Әйбернең төп хуҗасы.

Сыймас димә кашыкка,

Серле сүзне ачыкла.

Булмаса, сора ярдәм

Марка сөючеләрдән.

Кулланылган әдәбият

1.Нуруллин Р.Г. Альпинист үрмәкүчләр: шигъри башваткычлар / Ринат Нуруллин. — Казан: Татар. кит. нәшр., 2008. — 88 б. – 5000 д. – ISBN 978-5-298-01656-8.